MNF a sorkar chuan buhfai & tuialhthei man kan ennawn dawn - R Lalthangliana

MNF senior vice president Dr R Lalthangliana chuan nimin khan Mizo Hnam Rûna inkhawmah thu sawiin, MNF an sorkar leh a nih chuan buhfai man leh tuialhthei man an ennawn dawn thu leh, health care changtlung zawk an kalpui dawn thu a sawi.

Dr R Lalthangliana chuan, "Chhiah tipung ve lo tura insawi leh mipui phurrit siam ve lo tura insawi ZPM sorkar tharin ration buhfai man a lêt thawka tipungin, oil man uchuak takin a tipung a. Pathian leh mipui zarah MNF a sorkar leh hunah mipui phurrit chhâwk zângkhai thei turin kan ennawn leh ang," a ti.

MNF sorkarin an sorkar tirh aṭanga kum khat tling loah health care changtlung tak kalpui turin hma an la nia sawiin R Lalthangliana chuan, Finance Ministry-in ADB aṭanga loan vbc 1.000 a pawmpui tawh chu ZPM sorkarin a hlawhchhampui niin a sawi.

MNF Sr Vice President chuan, sorkar laipuiin Myanmar ramri km. 1,643-a thui BRO-in kum 10 chhunga hung zo turin hma a la thar nia sawiin, "MNF chuan kan dem. ZPM sorkar hian engtin nge a tih dawn? A do ngam a nih chuan a rang lama hma la ngei turin kan phût a ni," a ti.