Dâwngdah taka ram rawngbawl hna kan thawh a rem lo - ZPM President

ZPM president Lalliansawta chuan nimina ZPM Upa Committee-in IPR Auditorium-a Advance Christmas an hmannaah thu sawiin, Mizoram siamthat hna chu Pathianin ZPM koah a nghat a, dâwngdah taka ram rawngbawl hna an thawh a rem loh thu a sawi.

Lalliansawta chuan, Mizoram a dam lo tih mipuiin an hre chiang tih sawiin, "Ram siamṭhat duhtu intêl khawm kan nih angin siamṭhat hna hi Pathianin kan koah a dah a ni. Hruaitu hmasate kutah kan ram damna a awm lo tih mipuiin an hriat avangin ZPM kutah ram rawngbawl hna an hlan a, keini ho hian dâwngdah takin ram rawngbawl hna kan thawh a rem ve lo a, kan theihna zawng zawng nen Pathian duh dana ram siamṭhat hna thawh hi kan tih tur a ni," a ti.

Ram rawngbawlna atan political party a pawimawh tih sawiin Lalliansawta chuan, "Party hi sorkarna kan siam theihna hmun a nih avangin kan ngai pawimawh tur a ni a, kan inpui ber a ni tih kan hriat reng a ṭul," a ti a; ram siamṭha turin mi tin an pawimawh thu a sawi.