AR sipai thawk ṭha chawimawina hlan

Governor Dr Hari Babu Kambhampati chuan nimin khan Assam Rifles buatsaihin Raj Bhavan-ah AR sipai zinga hna thawk ṭha zual mi 35 hnenah chawimawina tangkapui a hlan.

AR Investiture Ceremony-ah hian AR 23 Sector deputy inspector general Brig. Girish Upadhya leh officer dangte an tel a; Governor-in AR sipai 15 hnenah Governor's Gold Medal leh mi 20 hnenah Governor's Silver Medal a hlan a ni.

Dr Hari Babu Kambhampati chuan, Assam Rifles chu India rama paramilitary force upa ber leh India hmarchhaka hmingṭha tak, 'Tlang mite ṭhian' an nih thu a sawi a, "Mizorama ruihhlo tawlh man leh dan loa sumdawnna vèn kawnga 23 Sector AR hmalakna a fakawm hle," a ti a; tun hnaiah ralthuam eng emaw zat leh hel thlenga man tura an hnathawhte chhuanawm a tih thu a sawi.

Governor's Gold Medal leh Silver Medal-te chu chawimawi phute chauh hlan ṭhin a nih thu sawiin Larsap chuan, "Hetiang chawimawina hlan theia ka awm hi ka lawm. Chawimawina dawngtute hian rinawm takin in hna thawk zel u la, in hlawhtlinna hi ram rawngbawl kawnga phûrna petu atan hmang ang che u," a ti.