CM-in a bialah Krismas thilpek a hlân

Chief minister Lalduhoma chuan nimin khan Serchhip DC pisa buatsaih Krismas leh kum thar puala luanchhuah hun a hmanpui a, mi 121 leh home pahnih hnenah Krismas thilpek a hlan. Serchhip district mi, infiamna lama hmingṭhate hnenah chawimawina a hlan bawk.

Serchhip DC pisa hall-a luanchhuah hun hmannaah Lalduhoma chuan, "Nun danin a zir loh vang te, hrisel loh leh vanduaina avanga rahbi tleu, hunpui lo thleng tur huphurh chhungkua tam tak an awm ṭhin a, chu'ng mite thleng phaka sorkar leh tlawmngai pawlte kan kùn hniàm a ṭul," a ti.

Chief Minister chuan, khawtlang hruaitu, kohhran leh tlawmngai pawlte hnenah mi rethei ṭanpui tura chona siamin, "Kan veng leh khuaah ngaihsakna dawng ngai lo an awm a nih chuan Isua zirtirna kan bawhchhia a ni. Sorkar, kohhran leh tlawmngai pawl hmalakna hrûla Samari miṭha hna thawk reng ṭhinte hi chawimawi tlak an ni," a ti. Infiammite chu an theihna leh thiamna tipung zel tur leh ṭan la zel turin a fuih bawk.

Inkhawmah hian Serchhipa village council 14 aṭangin mi panga ṭheuh, an vaiin mi 70 bakah, Thenzawl aṭangin mi 30, Neihloh aṭangin mi 10 leh Buangpui aṭangin mi 11-te hnenah Krismas thilpek hlan a ni a; Zoar Urban Deprived Children’s Home leh Unity Orphanage Home hnenah thilpek atan pawisa hlan a ni.