Lungleiah property tax lak a ni dawn

Lunglei Municipal Council (LMC) hotute chuan December 12, Ningani khan an pisaah thuthar thehdarhtute an kâwm a; LMC chairman Lalzuithanga chuan, Lunglei khawpuiah property tax lak a nih dawn thu an puang.

LMC Chairman chuan, Lunglei chu urban local body (ULB) a nih tâk avangin property tax 3.42%-a lak a nih dawn thu leh, property tax-a sum hmuh aṭanga 80% chu Lunglei khawpuia veng hrang hrang hmasawnna hna thawh nan hman a nih dawn thu a sawi a ni.

Lalzuithanga chuan, LMC chu mahnia inenkawl thei tura ngaih a nih angin, chumi tur chuan an inpuahchah reng thu te, motor parking fee lak, advertisement leh hoarding târ phalna, building regulation leh ui khuahkhirhna dante state sorkarah thehluh a ni tawh thute a sawi a; "PAHOSS sum bâng aṭangin vbc 20 chu LMC tan dah a nih angin ro tling tak siam nan hman a ni dawn," a ti.

LMC Chairman chuan, Lungleiah mi 750 hnenah dawr siam phalna pek a nih tawh thu te, LMC ward fai inelna LMC Award 2024 lawmman chu March 2024-ah sem tum a nih thu leh, LMC-ah thawktu 36 lak phalna sorkarin a pekah sum indaih lohna avangin post nghet panga leh nghet lo 13 lak tum mek a nih thute a sawi.

Press meet-ah hian LMC vice chairman K Lalrinawma, executive councillor Lalhruaitluangi Sailo leh chief executive officer Donny Lalruatsanga te pawh an tel a; December 2, 2024-a thi ta MJA member Johan Lalhmunmawia, DDK stringer sûnna hun hman a nih bakah, LMC-in a râlna hlan a ni.