School Education phalna la hmasa turin ti

School Education department chuan hriattirna chhuahin, sorkar sikulte chu School Education department phalna la hmasa loa zirlai naupangte puala intihsiakna leh programme dang buatsaihte bengkhawn lo turin a hriattir. Zirlaite puala programme buatsaih turte chu department-ah phalna la hmasa turin a chah bawk.

School Education department chuan, an hriatpui lohin sikul naupangte pual intihsiakna buatsaih leh programme hrang hrangah zirlaite sâwm an ni ṭhin tih hriat a nih thu a tarlang a, "Department-in school calendar a buatsaih mila zirlaite exam leh hun pawimawh tibahlah thei zawnga programme/activity duang lo turin pawl hrang hrangte kan ngen a, sikul naupangte puala intihsiakna/programme buatsaih turte'n department remtihna lak hmasak tur a ni," a ti.

Sorkar sikulte chu School Education department phalna la hmasa loa zirlaite puala intihsiakna/programme buatsaih tumte bengkhawn lo turin School Education department chuan a hriattir a; zirlaite puala programme buatsaih tur sorkar department dangte chu School Education Directorate aṭanga No Objection Certificate la hmasa ṭhin turin a ngen bawk.