Hâlpuah khapna thupek zâwm turin Congress President-in mipui a sâwm

Congress party chuan nimin khan an pisa, Congress Bhavan kumin atana khârna inkhawm an hmang a; thusawitu MPCC president Lal Thanzara chuan, sorkarin hâlpuah a khapna thupek chu zâwm ṭheuh turin Aizawl mipui a sâwm.

Lal Thanzara chuan, halpuah khap chu Congress sorkar lai aṭanga bul ṭan a nih thu sawiin, "Kan sorkarin upa zawk leh hriselna pan zawkte'n hlim taka Krismas leh kum thar an hman theih nan halpuah leh halmawi hâl a khap hi Pu Lal Thanhawla hun lai aṭanga bul ṭan a ni a, Aizawl mipuite'n sorkar thupek hi zâwm ṭheuh turin Congress party chuan kan sawm a ni," a ti.

Pathianin ram hruai tura Congress party a kaih thawh loh chuan Mizoram a rûm ṭhin nia sawiin Lal Thanzara chuan, "Harsa taka kan lo sual chhuah, kan ram ro hlu neihte hralh tum thu kan hria hi a lungchhiatthlak hle," a ti a; Lengpui Airport chu sorkarin kum tharah Indian Air Force hnenah hlan a tum nia an hriat thu sawiin, Congress party-in an do tlat thu a sawi.

AICC Congress Working Committee (CWC) member Lal Thanhawla, chief minister hlui leh MPCC president hlui pawhin thu sawiin, Congress party chu Pathian thil tum hre chunga an kal a ngaih thu a sawi.

Lal Thanhawla chuan, politics a inlumlet nasa tih sawiin, "Eng hunah nge kan inthlan dawn a hriat loh a, inring renga awm mai tur a ni. Kum hluia kan kal dante inen lêtin, kan tih dik lohte ngaihtuah zel a ṭul a, kum thara kan kal dan turte ruahman a ngai," a ti.

Lal Thanhawla leh Lal Thanzara te hian Krismas leh kum thar hlim taka hmang turin Mizoram mipui duhsakna an hlan a ni.