Secondary School Games khâr a ni

Mizoram Secondary School Games vawi 41-na chu nimin khan Kolasib Sports Stadium-ah khâr a ni. Khârna inkhawm hmanpuitu Assembly deputy speaker Lalfamkima chuan, mahni thawhna hmuna rinawm taka zirtir hna thawh chu zirtirtute tihmâkmawh a nih thu a sawi.

Lalfamkima chuan, zirtirtu eng emaw zat office-a dah (attach) an awm ṭhin chu pawi a tih thu a sawi a, "Zirtirtu chuan zirtirna hna thawka an post-a rinawm taka awm hi an tihmakmawh a ni. Zirtirtu mai ni lo, sorkar hnathawkte'n kan hna kan ngaih pawimawh a ṭul a, sorkarin awmna tur hmun a siamah thuawih taka an awm a ngai. Mipui tana thawk an nih avangin mipui mamawh huna an awm a pawimawh," a ti.

Zirlaite chu an zirlaiah theihtawp chhuah tur te, ram leh hnam humhalhna thinlung pu tur te, ruihhlo laka inthiarfihlim turtein Lalfamkima chuan a chah.

Mizoram Secondary School Games vawi 41-na hi December 10-13, 2024 chhungin neih a ni a; district 10 aṭangin zirlai infiammi leh zirtirtu mi 1,048 an tel a ni.