MIFCO-in lakhuihthei man a bat pe tla

Kum 2023-a Sialhâwk khaw mite thar lakhuihthei Mizoram sorkarin MIFCO kaltlanga a leina man bat chu nimin khan MIFCO chairman Lalṭhazuala Rawite-in a pe tla tih ZPM chuan an tarlang.

ZPM tarlan danin, lakhuihthei man bat inpek tlâkna hi Sialhawka RL Memorial House-ah buatsaih a ni a; Lalṭhazuala Rawite chuan, "Sorkar hmasa hunah khan Sialhawk lakhuihthei kha theihtawpa buaipui a ni chungin, a hralhna hriat mai loh ho kha MIFCO-ah dah a ni a, MIFCO-in pawisa an neih leh neih loh pawh ngaihtuah loin thuneitute aṭanga thupek an dawn angin kalpui a ni. Lakhuihthei leina man tur MIFCO-in a nei si lo a, kut hnathawktute tha hah man sorkarin a lo ba rei a, a pawi hle," a ti.

Lalṭhazuala chuan, lakhuihthei man eng emaw zat MIFCO-in a bat thu thawktute aṭanga a hriat hnuah Chief Minister hnenah a thlen tih sawiin, "CM-in kut hnathawktute thei man batsak ṭha a ti lo a, a rang thei ang berin pawisa min ngaihtuahsak a ni," a ti a; CM chungah an lawm thu a sawi.

MIFCO Chairman chuan, Chhingchhipa Fruit Juice Concentration Plant chu cheibâwl ṭhat mek a nih thu te, Bûng Bangla-ah Meat Processing Centre leh Sairangah Bottling Plant chei thar mek a nih thute a sawi bawk.

ZPM tarlan danin, Sialhawkah chhungkaw 250 velin lakhuihthei an chíng a, sorkar hmasa hun lai aṭanga MIFCO-in lakhuihthei man a batsakte chu chhungkaw 52 an ni.