KHAWTHLIR

Ruihhlo man

Excise & Narcotics department (END) chuan December 12, Ningani zan dar 8:30 khan Aizawl Tennis Court bulah methamphetamine kg. 3.93 leh heroin gram 787 (hawng 66) an man. Ruihhlo kaihhnawihah Lalhlunrenga (41) s/o HT Sanga, New Champhai, tuna Zorinpui, Lawngtlai district-a khawsa mek leh Lalthangzuala (39) s/o Lalthlamuana, Champhai Vengsang an man bawk.

Thisen pe

Lungleia Two Wheeler Taxi Association chuan nimin khan Lunglei Civil Hospital Blood Bank-ah thisen unit 23 an pe.

MRB ṭanpuina

Joint Council, Mizoram Rural Bank Union chuan Regional Rural Bank kum 50 tlin leh Krismas pualin nimin khan Mizoram hmun hrang hrangah luanchhuah hun an hmang a, home, damdawi-in leh hmun dang eng emaw zatah ṭanpuina an hlan. MRB hian Mizoramah branch 105 neiin, thawktu mi 507 an awm mek a; tun dinhmuna sum che vel chu vbc. 8981 niin, an CD ratio chu 66.31% a ni.

Zirhona buatsaih

Mizoram University-a Department of Information Technology, IIT-Bhilai leh Agriculture and Farmers' Welfare department-te chuan November 12-13, 2024 chhung khan Champhai Zotlang Branch YMA Hall-ah 'Agricultural enhancement using IoT & AI' tih thupui zirhona an buatsaih. Workshop-ah hian mithiamte'n thil pawimawhte an zirtir a ni.

Ṭanpuina hlân

Champhai Officers’ Club chuan nimin khan Champhaia home pakua, District Hospital leh District Jail-ah Krismas pual ṭanpuina Rs 82,000 an sem. Ṭanpuina inhlannaah hian an pawl president Dr Zatluanga leh bawrhsap VL Remliana te pawh an tel a ni.

Science Camp

Mizoram Science Society leh Lunglei Science Centre chuan December 12-13, 2024 khan Lunglei Science Centre-ah Winter Basic Science Camp an buatsaih. Lunglei leh a chhehvela sikul 20 aṭangin pawl 9 zirlai mi 42 an tel a; bawlhhlawh paih, tui renchem, ramngaw humhalh leh plastic hman tlem chungchangte inzirtir a ni.