MPSC thil tih chhui chiang turin MZP-in Mizoram sorkar an phût

MZP chuan, tun hnaia Mizoram Public Service Commission (MPSC) hnuaia hna lak hrang hrangah thil dik lo a awm ngei nia an ngaih thu an tarlang a; entomologist leh veterinary assistant surgeon hna lak dan December 20, 2024 ral hmain chhui chiang a, a ṭul anga hma la tur sorkar an ngen.

MZP chuan, MPSC-in sorkar hnathawk tur a lak danah thil fel lo awm anga social media-a sawite ngun takin an chhui tih tarlangin, "Kan chhui zuina leh ṭhalai hna zawng mekte aṭanga kan thu dawnte thlirin, thil fel lo a awm ngeiin kan hria. MPSC zahawmna humhim zel a nih theih nan thil dik lo awmte chhui chiang a, a ṭul anga hma la turin sorkar kan ngen. December 20, 2024 ral hmaa hmalakna a awm loh chuan hmalak zel dan tur kan ngaihtuah ang," an ti.

MZP tarlan danin, MPSC-in Health & Family Welfare department-a thawk tur entomologist post pakhat hna laknaah exam hmachhawn turin mi 22 an tling a, exam hmachhawntute zinga panga chu an document endik tura thehlut turin hriattir an ni. Thla 6 a ral hnuah mi pathum chu personal interview tura hriattir an ni bawk.

Interview nei tura inbuatsaihna a kal mek laiin, interview hun sawn hlat thut a ni a, hna diltu zawng zawngte document ennawn turin Screening Board member ruat thar a ni. Interview tura a tira koh tel loh Lalfakzuala Pautu chu koh tel a ni a, final result-ah Lalfakzuala Pautu chu a tling zui a ni. He thilah hian thil dik lo a awm ngei niin MZP chuan an ngai a, chhui chian an phût.

MZP chuan, "MPSC chak leh rintlak zawk hna zawng mekte'n an beisei laia MPSC a mualpho reng mai hi hna zawng mekte tan a lungchhiatthlâkin a beidawnthlak tak zet. Ngaihtuah thar sêng turin sorkar kan ngen a ni," an ti.