AMC-in thawktu tur lâkna a sût

Aizawl Municipal Corporation (AMC) chuan tun hnaia thawktu pali an lakna chu December 12, 2024 khan an sût. AMC-in thawktu an lak danah MZP chuan dan loa thil tih a awm nia an hriat avangin an dodal a ni.

AMC hian September 11, 2024-a AMC Executive Council Meeting thutlukna angin fixed pay-a thawk turin tun hnai khan public relations officer pakhat, project assistant pahnih leh assistant account officer pakhat lak tawh a ni. Contract basis-a thawk turin consultant geologist panga, urban animal husbandry & veterinary officer pakhat leh junior engineer pakhat lak tum a ni bawk.

AMC-in thawktu tur a laknaah hian MZP chuan thil felhlel, mimal induhsakna uchuak a awm ngeia an hriat avangin thawktu lakna chu tun kar chhung ngeia sût turin AMC an phût a ni. MZP chuan, AMC-in thawktu a laknaah hian state sorkar aṭangin phalna an lak loh thu leh advertisement chhuah a nih loh thu an tarlang bawk.

AMC-in thawktu a lak tawh - PRO pakhat, project assistant pahnih leh assistant account officer pakhat lâkna chu sût a ni a; AMC Commissioner chuan December 12, 2024 khan sûtna thupek a tichhuak a ni.

MZP President chuan, AMC hnuaia hna hrang hrang lakah advertisement chhuah loa duhsak zawngte thun a ni chu an hrethiam lo tih a sawi a, "Hetiang hi thleng nawn tawh lo se kan duh. MZP ngenna avanga AMC-in fixed pay-a mi pali an lak tawh a sût leh (revoke) hi a lawmawm kan ti," a ti.