Dampui S' mite sawn chhuak kim dawn; Minister-in mi 6 zangnadawmna a hlan

Environment, Forest & Climate Change (EFCC) minister Lalthansanga chuan nimin khan a pisaah Thorang Wildlife Sanctuary chhunga awm Dampui South khuaa chhungkaw paruk hnenah an awmna hmun sawn vanga zangnadawmna (reallocation fund) an dawn tur first instalment Rs 8,00,000 ṭheuh a hlan.

Zangnadawmna inhlanna inkhawm hi chief wildlife warden Pee Lee Ete-in a kaihruai a; EFCC Minister bakah, Aizawl deputy conservator of forest (WL) Margaret Lalramchhani ten thu an sawi.

Wildlife Protection Act 1972 Section 26A hnuaiah Thorang tlang chu April 23, 2002 khan Wildlife Sanctuary-ah puan a ni a, Thorang tlang huam chhunga Dampui S’ khaw mite chu National Rehabilitation and Resettlement Policy, 2007 hnuaia Option-I Reallocation Plan angin sawn chhuah an ni. He khuaah hian chhungkaw 61 cheng anga chhinchhiah a ni a, chhungkaw tin chu zangnadawmna Rs 10,00,000 ṭheuh pek tura ruahman a ni.

Dampui S’ Reallocation Plan siam a nih hnuah kum 2011 khan chhungkua 61 zinga 44 hnenah zangnadawmna first instalment pek a ni a, kum 2014 khan chhungkaw 47 hnenah second instalment Rs 2,00,000 pek a ni. Kum 2014-ah vêk chhungkaw paruk leh kum 2015-ah chhungkaw pahnih hnenah first instalment leh second instalment pek a ni a; chhungkaw 55 hnenah zangnadawmna pek a ni tawh.

Tun thlenga la insawn chhuak ve lo chhungkaw paruk chuan insawn chhuah an remtih tâk avangin Aizawl Deputy Conservator of Forest (WL), Thorangtlang Wildlife Sanctuary in-charged ni bawk hmalaknain inremna siam a ni. Inremna angin nimin khan chhungkaw paruk hnenah hian zangnadawmna first instalment pek a ni a, an insawn chhuah hnuah second instalment pek leh a ni ang.