Mizoram Police Sports Meet khâr a ni: Fitness prog.-in a kaih thawh zawh lohte a hun hmaa chawlhtir an ngai dawn - HM

December 9, 2024-a ṭan Mizoram Police Sports Meet vawi 22-na chu nimin tlai khan 1st MAP Ground-ah Home minister K Sapdanga'n a khâr a, PHQ group an champion. Home Minister chuan, fitness programme-in a kaihthawh zawh loh police-te chu a hun hmaa chawlhtir an ngaih tur thu a sawi.

Home Minister chuan, taksa insawizawina lama intuaitharna leh police-te'n taksa hrisel an neih theihna turin August 5, 2024-ah '4th Minuters for All Ranks of Mizoram Police' ṭan a nih thu a sawi a, "Thupui atan 'Train to excel' tih hmangin Mizoram Police unit hrang hrangah chhunzawm zel a ni. Police Headquarters pawhin thuchhuah siamin a bawhzui mek zel. Unit hrang hrangte'n lo chhunzawmin, kar tin PT parade leh inspection parade an nei chho reng a ni," a ti.

Ruahmanna thar chuan Mizoram police-te taksa fitness-ah leh inthununna vawn kawngah hma a sawntir an beisei tih sawiin K Sapdanga chuan, "August 21, 2024 khan DPAR chuan sorkar hnathawkte hna thawh ṭhat leh ṭhat loh enna periodical review neih dan tur inkaihhruaina office memorandum a tichhuak," a ti a; police-te pawh an fitness progamme-in a kaihthawh zawh loh khawpa hna thawk thei lo an awm a nih chuan a hun hmaa chawlhtir (premature retirement) thleng pawhin hma an lak dawn thu a sawi.

Home Minister chuan, ram a ralmuan a, mipui, nunau, tar leh chak lo zawkte himna atana hmalaknaah puak thei thil eng emaw zat kuminah man a nih thu a sawi a, "November 2024 thleng khan mi 24 man an ni a, thubuai 13 ziah luh a ni. Tunlai thiamna hmanga mipui buma mi dang sum laksak ṭhinte laka hmalakna atan Cyber Crime Police Station din niin, thawktute an thawk rim hle. Kuminah November thlengin hetiang lama harsatna tawkte pawisa cheng nuai 39 chu misualte kut aṭangin chhuh lêt a ni tawh," a ti.

Hâlpuah leh hâlmawi khapna khauh taka kenkawh a nih dawn thu sawiin Minister chuan, "A bik takin sorkar hnathawkte he thupek hi bawhchhe lo turin ka chah nawn duh," a ti a, thupek bawhchhiate chu dan anga hrem an nih tur thu a sawi.

Mizoram Police Sports Meet-ah hian police-te chu group 12-ah ṭhen an ni a, infiamna chi hrang hrang 18-ah an intihsiak. Gold medal 19, silver medal 22 leh bronze medal 24 latu Police Headquarters Group chu champion an ni.

Best athlete (men)-ah gold medal pathum latu Lalbiakhlua, 3rd MAP thlan a ni a, best athlete (women)-ah gold medal pahnih leh silver medal pakhat latu R Lalnunhlimi, Central Range thlan a ni.

Mizoram Police chuan, hmunhma hrang hrang hmantirtu department-te leh technical mi hmantirtu sport association-te chungah an lawm thu an tarlang.