Zirlaite HSLC exam form fill-up phalsak lo sikul MSU-in an dem

Mizo Students’ Union Gen.Hqrs chuan thuchhuah siamin, sikul ṭhenkhatte'n HSLC pass percentage ṭha duh vanga an zirlai ṭhenkhat HSLC exam form fill-up an phalsak lo chu an dem thu an tarlang a; sikulin HSLC exam an phalsak loh zirlaite chu MSU hnenah inhriattir turin an ngen.

Sikul ṭhenkhatin an zirlaite HSLC exam an phalsak lo nia an hriat chungchang hi MSU hruaitute chuan nimin khan an ngaihtuah a; thuchhuah siam nghalin, "Kum 2024-25 academic session chhunga sikul ṭhenkhatte'n result ṭha, pass percentage ṭha duh vang leh sikul hmingchhiat hlauh vanga an naupang ṭhenkhat, zirna lama hnufual deuha an ngaihte sikul hminga exam tura form fill-up phalsak an ni lo hi pawi kan ti tak zet," an ti.

MSU chuan, "Sikul hmingchhiat hlauh vanga an zirlai naupang ngei ngeite exam an phalsak lo hi sorkar thupek bawhchhiatnaah leh naupang chanvo chhuhsaknaah kan ngai," an ti a; exam phalsak loh zirlaite chu MSU hnenah an hming leh sikul hriattir vat turin Mizoram mipui an ngen a, phone number 7641941487 leh 9863455822 hriattir theih a nih thu an tarlang.