Governor-in MCU inkhawmpui a hmanpui

Mizoram Consumers' Union (MCU) chuan nimin khan Synod Conference Centre-ah Annual General Meeting vawi 27-na an hmang a; Governor Dr Hari Babu Kambhampati-a'n hmanpuiin, consumer-te dikna chanvo humhim nan theihtawp chhuah turin a chah.

Governor chuan, consumer lungawi lohna neite'n district leh state commission-a an vuivainate an thlennaah MCU-in theihtawp a chhuahpui ṭhin leh eirawngbawlna gas home delivery kalpui a nih theih nana an hmalaknate chu chhuanawm a tih thu a sawi a, "Consumer-te dikna leh chanvo humhim kawnga MCU innghahna bulpui parukte hre rengin theihtawp chhuah ang che u," a ti.

Consumer-te tan lungawi lohna thlenna tur National Consumer Helpline (NCH) toll-free number 1915 chu ṭawng chi 17-a siam a nih thu sawiin Larsap chuan, "Changtlung zawk turin NCH 2.0 duan mek a ni," a ti a; Integrated Grievance Redressal Mechanism (INGRAM) portal hmangin complaint thehluh theih a nih thu a sawi bawk.

Inkhawmpui hi MCU vice president Thanglura'n a kaihruai a; khualzahawm Saizikpuii, Food Civil Supplies & Consumer Affairs director, MCU president Prof. Chawngsailova leh general secretary H Lalbiakpuia ten thu an sawi. Chawhnuah rorel inkhawm neih a ni a, hruaitu thar an thlang a, president atan Thanglura an thlang.

MCU hian Aizawlah headquarters an nei a, district tinah sub-headquarters an neih bakah, branch 180 leh club 60 an nei mek a ni.