Minister hoin ruihhlo do dan tur rêl

Excise & Narcotics minister Lalnghinglova Hmar kaihhruaiin nimin khan Champhai DC conference hall-ah Ruihhlo Do Meeting neih a ni a; Champhai district-a sorkar hotu te, kohhran, khawtlang leh tlawmngai pawl hruaitute an tel.

Lalnghinglova Hmar chuan, ruihhlo do dan tur hrilh turin Champhaiah an kal lo tih sawiin, “Champhaia ruihhlo do dan tur chu Champhai mite'n in hre zawk a, in ngaihdan leh rawtnate ngaithla a, thawhhona ṭha zawk a awm theih dan tur sawiho tura rawn kal kan ni. Mizoram sorkar chu mipui sorkar a nih angin ruihhlo do kawngah pawh mipuiin sawi nei ve se kan duh a, sawiselna pawh kan pawm vek a ni," a ti.

Excise Minister chuan, ruihhlo donaah sorkarin theihtawp chhuah a rualin, khawtlang, tlawmngai pawl leh kohhrante nen thawhho a pawimawh thu a sawi a; ruihhlo ṭhat lohzia inzirtirna chu zirna-in leh kohhran ṭhalai inhmuh khawmnaahte nasa lehzuala kalpui a ṭul thu a sawi bawk.

Champhai North bialtu MLA H Ginzalala chuan, kil tin aṭangin ruihhlo do a ngai thu leh ruihhlo zuar leh ngawlveite laka hmalak leh enkawl chu tun dinhmunah ngaih pawimawh hmasak ni se a duh thu a sawi a, "Hun rei zawk atan hmathlir thui tak neiin, a ti lote zirtirna ṭha pek te, ṭhalaite eizawnna thar siamsakte a ṭul," a ti.

Ruihhlo Do Meeting-ah hian END secretary Lalramsanga Sailo, Champhai bawrhsap VL Remliana, SP Shivendu Bhushan leh Mizoram KVI Board chairman Lalremliana te pawh an tel a; Joint VC hruaitu te, Sub-Hqrs YMA hruaitu te, kohhran hruaitute leh sorkar hotute'n ruihhlo donaa hma an laknate leh an ngaih pawimawhte an sawi. END joint commissioner Peter Zohmingthanga'n Narcotic Drugs and Psychotropic Substances (NDPS) Act a sawifiah bawk.