Sorkar college-te infrastruc-ture grant leh research grant pe ve tura thlen rêl

Mizoram College Teachers' Association (MCTA) chuan nimin khan Hnahthial College-ah Annual General Conference vawi 45-na an hmang a; Mizoram sorkar hnenah sorkar college-te infrastructure grant leh research grant pe ve tura thlen an rêl.

MCTA inkhawmpui chawhma inkhawm hi vice president CVL Tlanhlua'n a kaihruai a; general secretary Dr Samuel VL Thlanga'n an pawl hmalaknate a tarlan bakah, an member zinga thi pakhat sûnna hun an hmang a ni.

Chawhnu lamah rorel inkhawm neih a ni a, an rorel zingah, 'Mizoram sorkar hian government college-te hnenah infrastructure grant leh research grant pe ve tura thlen ni rawh se' tih leh, 'Mizoram sorkar hnenah college tina IQAC-te hnenah an pual bik budget siamsak tura ngen ni rawh se' tihte a tel.

MCTA-ah hian sorkar college 24 leh posted outside college aṭangin member 597 an awm mek a; MCTA member ni lo zirtirtu 307 an awm bawk. Nikum chhung khan an member zinga mi 23 pension-in an chhuak a ni.