CADC-a MNF sorkar paih a ni; MNF MDC pariatin BJP an zawm

Chakma Autonomous District Council (CADC) chief executive member (CEM) Rasik Mohan Chakma chu December 11, Nilaini khan bûk a ni a, a mamawh ang zat thlâwptu a neih loh avangin CEM aṭangin paih a ni. MDC pakuain BJP an zawm a, CADC-ah hian sorkar siam thei an awm rih lo.

December 11 khan CADC MDC-te an ṭhukhawm a, elected member 20 zinga 18 an tel a, pahnih an tel lo. CADC CEM RM Chakma lakah no confidence motion put luh a ni a; motion hi MDC pakuain an thlâwp a, pariatin an thlâwp lo. Hei vang hian RM Chakma hian sorkar siam tura thlawptu neih ngai zat a hmu tling lo a, CEM aṭangin a tla ta a ni.

Thu dawn danin, RM Chakma kaihhruai CADC sorkar bûk a nih hma hian elected MDC 20 zingah MNF-in member 14, ZPM-in member panga leh BJP-in member pakhat an nei a; RM Chakma thlawp lotu zingah hian sorkar lai MNF member-te pawh an tel a ni.

CADC-a BJP thuchhuah tarlan danin, MDC pariat chuan BJP an zawm a, nimin khan Chawngtea BJP pisaah lawm luhna inkhawm buatsaih a ni. BJP zawmtute chu - Lakkhan Chakma, Sundor Muni Chakma, Molin Kumar Chakma, Ananta Bikash Chakma, Montu Chakma, Kalasoga Chakma, Supon Chakma leh Sanjib Chakma te an ni.

Heti hian 11th CADC-ah hian BJP-in member (MDC) pakua neiin, member ngah ber an ni ta a, MNF-in paruk leh ZPM-in panga an nei thung a; party mala sorkar siam thei an awm rih lo.

CADC-a BJP vice president Doyal Chandra Dewan chuan, CADC-ah BJP hma lam hun a êng hle nia sawiin, sorkar siam turin hma an sawn zel thu a sawi.