KHAWTHLIR

Thisen pe

KṬP, Thenzawl Bial chuan nimin khan Thenzawl Dinthar Kohhran hall-ah thisen pek an huaihawt a, Lunglei Civil Hospital tan thisen unit 26 an pe a, petute mipa 16 leh hmeichhia 10 an ni. Lunglei Civil Hospital tan vek College of Horticulture, Thenzawla mipa pakua leh hmeichhia parukte'n thisen unit 15 an pe a; Thenzawl Higher Secondary School pawhin unit 38 an pe a, petute hmeichhia 20 leh mipa 18 an ni. North Vanlaiphai Higher Secondary School NSS pawhin nimin khan Serchhip District Hospital tan thisen unit 8 an pe bawk.

Thingsai PACS

Thingsai Agri-Farming Cooperative Society enkawl Primary Agriculture Credit Society (PACS) chu nimin khan Mizoram Cooperative Apex Bank chairman Lalnunsanga'n a hawng. PACS hawnna inkhawm hi Thingsai community hall-ah buatsaih a ni.

MSSA inkhawmpui

Mizoram Sericulture Service Association chuan nimin khan Sericulture Directoretae conference hall-ah General Conference vawi 41-na an hmang a, Sericulture minister Lalthansanga'n a hmanpui. Minister chuan, theihtawp chhuaha Mizoram tan an thiamna leh ngaihtuahnate hmang turin MSSA member-te a chah.

YMA jubilee lawm

YMA, Serkhan Branch chuan nimin khan an kum 50 (golden jubilee) tlin an lawm a, Tuirial bialtu MLA K Laldawngliana, Central YMA president Lalhmachhuana leh YMA Sub-Hqrs. Kolasib hruaitute'n an hmanpui. Tlaiah khawtlang huapin jubilee ruai an ṭheh a ni.

Kutdawh an man

MZP Headquarters, Mamit chuan nimin zing lam khan Mamitah lehkha lem hmanga kut dawh hnam dang pahnih an man. Mamit MZP tarlan danin, an mi man pakhat chu S Ravi Kumar, Hyderabad nia insawi, ṭawng thei lo leh bengngawng anga insawiin kut a dawh a, nimin zing dar 9:30 vela Mamit Hmarvenga kut a dawh chu lehkha pawimawhte an enfiah a, a lem a ni tih an chian hnuah police an hrilh a, Mamit Police Station-ah an hruai nghal a ni.