Kan ngaih pawimawh ber chu mipui harsatna sutkian a ni - LRS Minister
Land Revenue and Settlement (LRS) depart-ment chuan nimin khan an conference hall-ah e-Ram Software zirhona an buatsaih a; an hun hmanpuitu LRS minister B Lalchhanzova chuan, an ngaih pawimawh ber chu mipui harsatna sutkian a nih thu a sawi.
Revenue Minister chuan, ram teh leh ṭul dangte thawk tura an chhawr empanelled firm-te chu an theihtawp chhuaha mipui rawngbawl turin a chah a, "Ram teh muang lutuk ṭhìn avanga mipui harsatna sutkian hi survey firm kan rawih chhan a ni. Kan ngaih pawimawh ber tur chu mipui harsatna sutkian a ni a, kan hmalakna thar hian mipui a tichi-ai tur a ni lo. Awlsam taka ram teh duhte'n rang taka sorkar office dawr kher loa an ram an teh zung zung theih hi sorkar duh dan a ni," a ti.
B Lalchhanzova chuan, empanelled firm-te chu hlâwk tuma firm din an nih rualin, kal sualna lakah nasa tak fimkhur turin a chah a, "Sorkarin survey hna private firm-te thawh theiha a siam chhan chu mipui harsatna sutkian a nih angin, mipui harsatna siam belhtu ni lo ang che u. Mipui hi dinhmun inang lo tak tak an ni," a ti a, zah tak leh hawihhâwm taka remruatpui turin a chah.
e-Ram Software hi November 5, 2024 khan Chief Minister-in a lo tlangzarh a; nimina e-Ram Software zirhonaah hian LRS department hnuaia empanelled survey firm-te'n e-Ram hmanga detailment an dawn dan tur leh an survey tawh report siam leh kalpui dan turte an dawng a ni.