Ruihhlo vanga harsatna na takin nawr tawm tlat tur a ni - CM

New Serchhip chuan nimin khan Serchhip College campus-ah an kum 50 (golden jubilee) an lawm a; khuallian chief minister Lalduhoma, bialtu MLA ni bawk chuan, ruihhlo vanga harsatna thleng mek chu na taka nawr tawm tlat tur a nih thu a sawi.

Chief Minister chuan, mi fel pakhat avangin khawtlang an inchhuang thei a, misual pahnih khat lekin an tihmingchhe hle thei bawk tih a sawi a, "YMA leh NGO dangte lo ṭang u la, a ṭul ang zela kan police-te nena thawkhoin, khauh takin hma la ang che u. Ruihhlo vanga harsatnate hi kan pumpelh vek sêng lo a nih pawhin, na takin kan nawr tawm tlat tur a ni," a ti.

Tourism tihhmasawnna kawngah hmunhma an neih ṭhat avangin Serchhip leh a chhehvel aṭanga bul ṭan an tum thu sawiin Lalduhoma chuan, "Tunah pawh International Paragliding Championship neih mek a ni. Khualzin hîp thei kan hmunhma kan neihte i duat ang u," a ti a; miziaah pawh mi dang hîp thei zawnga nun tum turin mipui a chah.

Chief Minister chuan, New Serchhip chu a ṭhang chak hle tih sawiin, "Kum 50 chhungin New Serchhip hi VC pahnih leh YMA branch pali ni khawp hialin a ṭhang a ni. Zirna lamah college ṭhuthmun a ni a, sorkar hmun pawimawh tam tak a awm. Ṭhanglian zel turin ram rem tak a nei bawk," a ti.

New Serchhip golden jubilee lawmna hi organising chairman C Lalrotluanga'n a kaihruai a, khawtlang tihmingṭhatute chawimawina hlan a ni.

New Serchhipah hian April 1974-ah chhungkaw pakhat an awm ṭan a, chuta ṭang chuan an pung chho zel a; kum 2023-a an inchhiar danin, chhungkaw 980 velah mi 4,500 vel an chêng mek a ni.