Lok Sabha MP-in Manipur-ah remna palaia ṭang turin sorkar laipui a phût

Lok Sabha MP Richard Vanlal-hma­ngaiha chuan nimin khan Parliament winter session-ah thu sawiin, Manipur buaina chu sipai tirh luh belh hmanga chin­fel chi a ni lo a, dawhkan kîlhoa chin­fel chi a nih avangin remna palaia ṭang turin sorkar laipui a phût tih a sawi.

Richard Vanlalhmangaiha chuan, Manipur tualchhung buaina chu a rei tawh hle tih sawiin, "Mi 200 chuang zet an thi tawh a, mi 50,000 chuangin in leh lo an chân tawh a, Kristiante biak-in 300 chuang hâl a ni tawh. Sorkar laipui tan mahni ram chhung ngeia buaina thleng hi chinfel dan ngaihtuah a hun hle a ni," a ti.

Lok Sabha MP chuan, "Tun dinhmunah sorkar laipuiin paramilitary force tam tak pawh tír lut mah se, community pahnih inkara inremna a awm si loh chuan an harsatna hi sutkian tak tak a nih a rinawm loh. Chuvangin, sorkar laipuiin community pahnihte dawhkan pakhat kîlpui a, an harsatna sutkian dan tur sawipuia remna palaia ṭang turin ka phût a ni," a ti a; buaina chinfel dan kawng ṭha zawk ngaihtuah thuai a nih loh chuan thi an awm belh zel dawna a lan thu a sawi.

Richard Vanlalhmangaiha chuan, Myanmar, Bangladesh leh Manipur buaina vanga Mizorama Zo hnahthlak raltlante tan sorkarin laipuiin chhawm­dawlna sum leh pai ṭhahnem tak Mizoram sorkar hnena a pek avangin a lawm thu a sawi bawk.