Governor-in oil palm chíngtute a kâwm; Kum 2 chhungin oil palm MT 11,503 thar

Governor Dr Hari Babu Kambhampati chuan nimin khan Raj Bhavan-ah Kolasib leh Mamit district-a oil palm chíngtu pawl hruaitute a kâwm a, harsatna an thlenah hma a lâ nghal. Kum hnih kal ta, November 2022 aṭanga October 2024 chhung khan Mamit leh Kolasib district-ah oil palm metric ton 11,503 thar a ni.

Dr Hari Babu Kam-bhampati chuan, India rama hriak ei chi (edible oil) mamawh tam zawk chu ram dang aṭangin lak luh a nih thu a sawi a, "India sorkar chuan hriakah intodelh turin theihtawp a chhuah a, National Mission on Edible Oils - Oil Palm (NMEO-OP) kaltlangin oilseed tam zawk thar turin ṭan a la a ni," a ti.

Mizoram chu oil palm thar tamna leh hriak ei chi lak luh tamna Malaysia anga theihna nei a nih thu sawiin Larsap chuan, oil palm-ah theihtawp chhuah a ṭul thu a sawi.

Oil palm chíngtute chuan Governor hnenah hian, NMEO-OP kaltlanga kum 2022-2024 chhunga oil palm hralhtute hnena viability gap payment pek tur tun thlenga sorkar laipuiin a la pek loh thu an thlen. Larsap chuan hma la nghalin, sorkar laipuia hemi buaipuitute phone-in a be nghal tih sorkar thuchhuahin a tarlang.

Oil palm chíngtute tarlan danin, Kolasib leh Mamit district-a oil palm tharte chu Agriculture department hnuaiah Godrej Agrovet-in kum 18 vel chhung an lei tawh. Godrej Agrovet chuan a thartute hnenah an leina man chu bank account-ah thla khat chhungin vawi hnih an pe ṭhin.

Oil palm chingtute'n an hralh zat ang zelin NMEO-OP hmangin sorkar laipuiin viability gap funding (kg khatah Rs 2 vel) a chíngtute bank account-ah a pe ṭhin tur a ni a, mahse, November 2022 aṭanga tun thlengin sorkar laipuiin a pe tawh lo. Central-in a pek tur a la pek loh zat chu cheng nuai 330 vel a tling.

November 2022 aṭanga October 2023 (oil palm year) inkar khan oil palm Kolasib district-ah metric ton 2,080 leh Mamit district-ah metric ton 3,972 hralh a ni a, a vaiin metric ton 6,052 niin, chuta ṭanga viability gap funding an hmuh tur chu cheng nuai 169 vel a ni.

November 2023 aṭanga October 2024 chhung khan Kolasib district-ah metric ton 1,929 leh Mamit district-ah metric ton 3,522 thar a ni a, a vaiin metric ton 5,451 niin, VGP an la dawn loh chu cheng nuai 164 vel a ni.

Mamit leh Kolasib district-ah hian oil palm huan siama a rah hralh mek chhungkaw 600 chuang an awm a, Godrej Agrovet hian kg khat Rs 10-15 inkarin a leisak mek a ni.