Hmasawnna inbûk tâwk kalpui tum a ni - Chief Minister

Chief minister Lalduhoma chuan, Mizoram sorkarin infiam­naah hmasawnna thlen a duh rualin, kawng­pui, zirna, hriselna lam, kut hnathawktute chawikan leh police thuam chak­ahte inbûk tâwk taka hmasawnna kalpui tum a nih thu a sawi.

CM Lalduhoma hian December 11, Nilaini zana Champhai Chhangphut Field-ah flood light a hawnnaah thu sawiin, "Mizoram sorkarin infiamnaah hmasawnna thlen a duh. Hetih rual hian, ram sum leh pai dinhmun hre chungin thil pawimawh dang - inkalpawhna kawngpui ṭha, zirna leh zirna-in ṭha, hriselna lama inenkawlna ṭha zawk, police thuam chakte leh kut hna­thawk­tute chawikante nen hmasawnna inbûk tâwk kalpui a tum a ni," a ti.

Bána Kaih scheme hnuai­ah Mizoram sorkarin infiammi, theihna nei ṭhate zawng chhuak tur­in cheng vbc 2.5 a rua­hman tih sawiin Chief Minister chuan, "Kum thar aṭangin hmalak ṭan tum a ni. Sports-ah kal tum dan neiin, tinzawn nei­in kan kal zel dawn," a ti a, infiamna hmunhma siam­te ngaihthah chuang loin, infiammite an ngaih pawi­mawh dawn thu a sawi.

Sports & Youth Services minister Lalnghinglova Hmar pawhin thu sawiin, "Mizo ṭhalaite hi football mai ni lo, infiamna dang­ah pawh hlawhtling turin sorkar chuan a duhsak a, India sorkarin Olympics 2036 thleng tura rua­hman­na a kalpui mek zûl­zui­in sport discipline thlan bik­ah hmalak tum a ni," a ti.

Lalnghinglova Hmar chuan, Bána Kaih scheme hnuaiah infiammite bánah sorkarin a kai dawn tih sawiin, "Bul ṭanna atan Tuipuiral Games-ah infiamna thar pahnih telh thar tum a ni a, Tuichangral Games-ah pawh infiamna thar pathum telh tum a ni," a ti a; infiammite hmasawnna turin sorkarin hmalak a tum a, a tlanchhe dawn lo tih a sawi bawk.