Sorkar an khinnaah VC-te inhnûkdâwk; Khinna thar an thehlut leh nghal

All Mizoram Village Council Association (AMVCA)-in VC term pawh tawi a nih avanga Mizoram sorkar an khinna chu nimin khan Gauhati High Court, Aizawl Bench-ah ngaihtuah tur a ni a, AMVCA an inhnuhdawh avangin ngaihtuah a ni lo. Hetih lai hian, AMVCA ukilte chuan nimin vêk khan sorkar khinna thar an thehlut leh nghal.

AMVCA hian VC term pawh tawi a nih avangin Mizoram sorkar khinna December 6, 2024 khan Gauhati High Court, Aizawl Bench-ah an thehlut a; High Court chuan December 11, Nilaini khan nimin (December 12)-a ngaihtuah turin thutlukna a siam.

AMVCA aṭanga thu dawn danin, AMVCA-te'n an khin ber chu November 20, 2024-a Mizoram sorkarin VC-te term a pawh tawina order a ni. Mahse, court-a sorkar ukilte'n document an thehluhah chuan VC term chu November 21, 2024-a pawh tawi anga ziah lan a ni thung. Order hi AMVCA lamin an hre lo a, sorkar ukilin a thehluh hnuah an hre chauh a ni.

Court-a an inhnuhdawh leh hnu hian AMVCA ukilte chu November 21, 2024-a VC term pawh tawina order khinna thehlut turin an inbuatsaih nghal a, nimin vek khan an thehlut.

AMVCA hruaitute chuan zawhna chhangin, VC term pawh tawina order November 20, 2024-a mi bak an hmuh loh thu an sawi a, "November 21, 2024 hi an backdate nge kan hre lo. Keini lam chuan kan hmu lo a, kan hre lo hrim hrim. Chuvangin, khin let lehnghal pawh hi duh kan ni," an ti a, an term pawh tawina chu court-a khin ngei an tum thu an sawi.