PWD Minister-in Tlawng lei dawh a enpui

PWD minister Vanlalhlana chuan December 7, Inrinni khan Sihhmui bula Tlawng lei (bridge) dawh kai tur enchhinna a hmunah a enpui a; lei dawh kai aṭanga ni 120 chhungin lirthei zawh theih tura hawn hman tum a nih thu a sawi.

Vanlalhlana chuan, Mizoram kawng pawimawh tak thlun zawmna tur Tlawng lei rem khawm mek chu hlawhtling taka dawh a nih theih nan enchhinna neih a nih thu a sawi a, "Ruahman anga hna kalpui a nih chuan kar leh chhung hian lei dawh kai hman beisei a ni a, lei dawh kai aṭanga ni 120 chhungin lirthei eng pawhin a zawh theih tur a hawn hman tum a ni," a ti.

Vanlalhlana chuan, thiamna changkang tak hmanga lei rem khawm leh dawh a nih avangin hun eng emaw chen kawngpui khâr a ngai chu pawi a tih thu a sawi a; inkalpawhna ṭha leh rintlak zawk neih a nih theih nan hun rei lo te chhung lo dawh hram hram turin mipui a ngen.

PWD Minister hi PWD chief engineer (Highway) H Zoramliana leh hotu dangte'n an ṭawiawm a ni.

Lei dawh hna thawktu Poddar Infratech Pvt. Ltd., Delhi engineer sawi danin, lei dawh kai a nih hnuah lei ruhrel chungah cement-in kawng chhuat chhûn leh tur a ni a, March 2025-ah chuan lirthei tlan theiha zawh hman tum a ni. Lei tawpna aṭanga kawngpui pangngai metre 100-150 vel ve ve chu lei dawhtute'n an thawm ṭha bawk ang.

TLAWNG LEI DAWH MEK

▶ Tlawng lei dawh mek hi 'Network Inclined Arch Bridge' tih a ni a, contractor chu Poddar Infratech a ni.

▶ March 27, 2021-ah contractor-in hna an thawk ṭan.

▶ Project kalpuina atan Ministry of Road Transport & Highway aṭangin cheng vbc 36.99 ruahman a ni.

▶ Lei thar hi dah/hlan kai a nih hunah kawng khâr mek chu lirthei tlan theiha hawn tur a ni a, tun kar laihawlah hawn hman beisei a ni.

▶ Lei structure hi ton 450 (kg 4,50,000) vela rit, metre 90 (ft. 295.276)-a thui, 70R loading class a ni.

▶ Hrui hmanga khai phei a ni dawn a, minute khatah cm.30 zelin pawh phei a ni ang.

▶ Darkar 6-8 chhunga hlân kai hman beisei a ni.