Synod inkhawmpui vawi 101-na a ṭiak; Pastor thar 17, pro. pastor thar 19 an awm

Synod inkhawmpui vawi 101-na, Mission Vengthlang kohhran biak-ina December 3, 2024 zan aṭanga neih chu nizan khan a ṭiak. Nimin khan pastor atan mi 17 nemngheh niin, probationary pastor atan mi 19 dahngheh an ni.

Synod inkhawmpuiah hian December 4-7 chhung Synod moderator Rev. RC Lalnghakliana kaihhruaiin chhûn lamah rorel a ni a, Inrinni khan Synod Executive Committee leh board hrang hrang aṭanga thu lutte ngaihtuah a ni. Council of Churches in Mizoram puala Special Sunday siam rawtna an pawm a, kum tin October thlaa Pathianni vawi lina chu CCM Sunday atan hman a ni ang.

Inrinnia thu ngaihtuah an pawm zingah - Aizawl Theological College bula kraws lian siam mek atan Synod budget-a sum dah te, Presbyterian English School ṭha zawka enkawl dan tura rawtna leh ruahmanna te, Synod Service Rules enṭhatte a tel. Nupa chungchang dan enṭhat chu hman nghal turin an pawm a; Central KṬP leader atan Rev. H Lalawmpuia an pawm bawk.

Nimin khan chawhma inkhawmah Synod Moderator-in pro. pastor ni lai mi 17 chu pastor atan a nemnghet a, pro. pastor atana lak thar mi 19 chu a dahnghet bawk. Pro. pastor thar mi 19 zinga 14 chu Synod Pastoral hnuaia awm tur an ni a, mi pahnih chu Synod Mission Board hnuaia awm niin, mi pathum chu field worker tur an ni.

Nimina chawhnu inkhawmah pension-a chhuak tur minister-te thlah an nih bakah, nikum Synod leh kumin Synod inkara minister thite sûnna hun hman a ni a, Lalpa Zanriah Sakramen kîlho a ni bawk. Nizan khan Synod moderator kal chhuak Rev. R Vanlalnghaka'n thuchah a sawi.