Zo hnamte rorelna pakhat hnuaia la awm khawm rin thu Zofest thurolumah puang

MZP buatsaih Zofest 2024 chu nimin khan West Phailengah chhunzawm a ni a; thurolum siamin, Zo hnahthlakte chu ramriin ṭhen darh rih mah se, engtikah emaw chuan ram rorelna pakhat hnuaiah an la awm khawm an rin tlat thu an tarlang.

Zofest-ah hian nimin chawhnu khan Zofest thupui sawihona 'Pûm titi' buatsaih a ni a, Zo fate inlungrualna tur leh thawhho dan tur sawiho niin, thurolum an siam. Thurolumah chuan, "Ramriin min ṭhen darh rih mah se, engtik níah emaw chuan ram rorelna pakhat hnuaiah kan la awm khawm ang tih kan ring tlat a ni," an ti.

Nimina Zofest hi minister of state Prof. Lalnilawma'n a hmanpui a; thu sawiin, "Zo fa hnam chi pêng hrang hrangte hi kan inpumkhat zel theih nan kan inunauna tichhe thei zawnga ṭawngkam hman hi a pawi thei hle a, kan inunauna tihngheh zel a nih theih nan kan ṭawngkam hman kan fimkhur a ngai," a ti a; hmun hrang hranga Zo hnahthlakte chu an awmna hmun ṭheuhah hnam bil din khawchhuahna aiin, Zo hnam anga din khawchhuahna tur buaipui turin a chah.

Adviser to CM (Political) Lalmuanpuia Punte, MLA-in Zofest thupui, 'Hrui khat vuanin' tih a sawi a; "Zo fate'n kil hrang hrang aṭangin beih kan tâwk nasa a, hetiang hi kan dinhmun a ni chung pawha kan inlungrual hlei thei lo hi chu a hahthlak hle. Hrui khat kan vawn a, kan ṭanrual vat loh chuan kan darh vat ang. Zo fate hi kan awmna hmun azira koh dan hnam hming hrang nei kan ni a, Zo hnam hi kan inlungrualna ber nia a lan avangin i ṭangrual zel ang u," a ti.

Nimina Zofest-ah hian Manipur buaina vanga Zo hnahthlak tun hnaia thi mi 12 sûnna hun hman a ni.