Synod Inkhawmpui 2024 ṭan a ni

Mizoram Presbyterian Kohhrana rorelna sang ber Synod Inkhawmpui vawi 101-na chu December 3, Thawhlehni zan khan Mission Vengthlang Kohhran biak-inah ṭan a ni a; Aizawla Cancer Hospital bulah Synod Khualbûk sak an rêl.

Synod Inkhawmpuiah hian nimina rorel ṭan hmain moderator kal chhuak Rev. R Vanlalnghaka'n moderator thar Rev. RC Lalnghakliana hnenah puithiam kawr hlâna mawhphurhna a pek hnuah Moderator thar kaihhruaiin rorel a ni. Nimin khan palai 1,757 an tel.

General agenda 35 a awm a, Synod Executive Committee leh board aṭanga thu lut eng emaw zat a awm bawk. Nimin khan Ramlai Presbytery aṭanga lut, Cancer Hospital bula Synod Khualbûk siam rawtna an pawm a, SEC bawh zui turin an dah. Presbyterian Church of India emblem-a kraws dah tel rawtna pawh pawmin, PCI General Assembly-ah thlen an rel.

Nimin khan nomination hrang hrang ngaihtuah a ni a, kum 2025 Synod Inkhawmpuia Moderator atan Bethlehem Venglai Pastor Bial vawng mektu Rev. John Raldosanga thlan a ni. Pastor nemngheh tur leh probationary pastor atana lak thar dahngheh tura rawtna lutte pawm a ni a, pastor eng emaw zat awmna sîksawi a ni.

Synod Inkhawmpui hian pastor bial thar panga hawn tura pawm a ni a, chu'ngte chu Saikhawthlir Bial, Ludhiana Bial, Amrapara Bial, Tarahara Bial leh Bangnan Bialte a ni. Presbytery pathum - Hmarthlang, Kolasib leh Teirei aṭangin Bairabi Presbytery thar hawn an rêl. Kum 2028 Synod chu College Veng Kohhran biak-inah nghah an rel bawk.

Tun ṭuma Synod Inkhawmpui hi Mission Vengthlang Pastor Bialin an thleng a, Inrinni thleng chhun lamah rorel a ni dawn a, zanah vantlang Pathian biak inkhawm a awm ṭhin ang. Pathianni chawhmaah pastor nemngheh leh pro. pastor dahngheh a ni dawn a, chawhnuah Lalpa Zanriah Sakramen ṭheh a nih dawn bakah, pastor thite sûnna hun hman a ni ang.

Kumina Synod Inkhawmpui thlarau lam thupui chu 'Lalpa kawng buatsaih' tih a ni a, December 7, Inrinni zanah Rev. C Sapkaia'n a sawi dawn a ni.