Kolasib-ah State Handloom Exhibition; PSU-te hi intodelhtir tura mite ṭanpuina tur a ni - K Sapdanga

ZOHANDCO chuan nimin khan Kolasib-a Taitesena Hall-ah Hathkargha Mela - State Handloom Exhibition an buatsaih ṭan a, minister K Sapdanga'n hawngin; PSU-te chu sum thawk chhuaktu ai mahin, mihring intodelhtir tura mite ṭanpuina tur a nih thu a sawi.

State Handloom Exhibition hi December 18, 2024 thleng buatsaih tur a ni a, sorkar laipuia Ministry of Textile aṭanga sum hmuh hmanga buatsaih a ni. Ministry of Textile ruahman angin kumin 2024 chhungin State Handloom Exhibition vawi thum buatsaih a ni tawh a, Kolasib-a huaihawt hi a vawi lina leh kumina a hnuhnung ber tur a ni.

K Sapdanga chuan, public sector undertaking (PSU)-te chu sorkar hmasa lamah lo beidawnpui deuh tawh mah se, ZPM sorkar chuan chhawr ṭangkai theih inbeiseiin an tuai nung thar leh tih a sawi a, "PSU-te hi sum thawk chhuak turin kan beisei ṭhin a, sum thawk chhuaktu ai mahin mihring intodelhtir (self employment) ni thei tura mi dangte ṭanpuina tur a ni," a ti.

Kut hnathawh leh intodelh an sawi uar avangin ZPM sorkar chu mi ṭhenkhat tan chuan a hnèawm mai thei tih sawiin Sapdanga chuan, "Leilung nena inzawm, leilung hausakna hai chhuah leh chhawr kawnga hmasawn kan duh a, tunah pawh kan buaipui ber chu Bana Kaih Policy a ni. Bána kaih theih turin mipuite'n kan bán kan lo phar chhuah ve a ngai dawn a ni," a ti a; Chief Minister kaihhruaina hnuaiah nasa takin hma an la mek tih a sawi.

K Sapdanga chuan, sorkarin thlai thar a buaipui vak chhan sawiin, sum leh pai deh chhuah leh hlâwkna hi chu a pahnihna a nih thu a sawi a, "A pakhatna chu mahni kut ngei hmanga intodelh hi a ni. Chu chuan kan ṭhalaite rilruah rilru dik pu se la, kutdawh rilru ni lo, intodelhna rilru an put hi kan duh ber a ni," a ti.

Home Minister chuan, tun hnaiah sorkarin hna hrang hrang a la a, group D hna lakah BA leh MA degree neite pawh dil an awm thu sawiin, "Hei hian a entir chu, hlawhtlinna hi zirnaah a awm ber bik lo a, taimakna leh rinawmnaah a awm a ni. Office-ah tu emaw hnuaia thawk tura inhawr tuau tuau loin, kan kut leh ke, kan thluak hmanga intodelh tura min kaihruaitu atan ZOHANDCO hi a awm reng a ni," a ti a; ZOHANDCO chhawr ṭangkai thiam turin mipui a chah.

K Sapdanga chuan, State Handloom Exhibi-tion chu mipuite'n ṭang-kaipuiin hlawkpui ngei se a duh thu a sawi bawk.

State Handloom Exhibition hawnnaah hian KVI Board chairman K Lalremliana leh MAMCO chairman Isak Malsawma te pawh an tel a ni.