Thei leh thlai aṭanga theitui/wine siam theih nan dan siamṭhat tum a ni - Agriculture Minister

Agriculture & Farmers Welfare minister PC Vanlalruata chuan, kut hnathawktute thei leh thlai thar aṭangin theitui/wine siam a nih theih nan dan siamṭhat tum mek a nih thu a sawi.

PC Vanlalruata hian November 30, Inrinni khan Thenzawl Dragon Fruit Growers & Marketing Society General Assembly vawi 4-na a hmanpuinaah thu sawiin, "Kut hnathawktute'n thei leh thlai an tharte chu theitui emaw, wine emawa siam chhuah a nih theih nan dan siamṭhat tum mek a ni," a ti a; ei tur sawngbawlna lama sorkar hmalaknate a tarlang.

Kut hnathawktute'n an thar chhuahte hlawk zawka an hralh theihna tura hmalak chu sorkarin a tum ber a nih thu sawiin Minister chuan, "ZPM sorkar chuan kut hnathawktute a dah pawimawh ber a, kut hnathawktute lamah sorkar a ṭang tlat dawn a, thawhhona ṭha tak kan neih a pawimawh," a ti.

Agriculture Minister chuan, zaù ang zawnga hmalak chu sorkar auhla a nih thu sawiin, Lamlian Dung zaua Thenzawl Dragon Fruit Growers & Marketing Society-te hmalakna chu fakawm a tih thu a sawi a; Local Soda Pvt.Ltd nen thawhona thuthlung an ziak chu ṭha a tih thu a sawi bawk.

Thenzawl Dragon Fruit Growers & Marketing Society General Assembly hi an chairman C Lalrinthanga'n a kaihruai a, Lamlian Dung zaù kawng laih tur leh tuikhuah tur chungchanga hmalaknate tarlan a ni. Society hi kum 2021-ah din niin, member 40 an awm mek a, Local Soda nen an thlai thar chungchang sumdawnna atan kum thum daih thawhhona thuthlung an ziak a ni.

Agriculture Minister hi adviser to CM Lalmuanpuia Punte, Aizawl South-III bialtu MLA Baryl Vanneihsangi leh South Tuipui bialtu MLA Jeje Lalpekhlua ten an ṭawiawm a ni.