3rd Mizoram EMRS Sports Meet khâr a ni

3rd Mizoram State EMRS Sports Meet chu November 26-29, 2024 chhung khan neih a ni a, gold medal 27 latu Eklavya Model Residential School (EMRS) Lawngtlai chu a pumpuiah pakhatna an ni.

Meet-ah hian Mizorama EMRS 11 - Lunglei, Serchhip, Ngopa, Lawngtlai, Chawngte, Tuipang, Tlangnuam, Tlungvel, Niawhtlang, Bilkhawthlir leh Zawlnuam-te an tel a; infiamna - athletics, taekwondo, judo, wrestling, weightlifting, chess, boxing, indigenous games, swimming, table tennis, badminton, volleyball, basketball leh football-ahte zirlai 330 an intihsiak a ni.

Intihsiaknaah hian EMRS, Lawngtlai chuan gold medal 27 lain pakhatna an ni a, EMRS, Serchhip chuan gold medal 24 lain, pahnihna an ni a, EMRS, Tuipang chuan gold medal 23 lain pathumna ni thung.

December 14-19, 2024 chhungin Raipur, Chhattisgarh-ah national level EMRS Sports Meet 2024 a awm dawn a, chutah chuan Mizorama EMRS Sports Meet-a ti ṭhate tirh an ni ang.

EMRS Meet hi November 29 tlai khan khâr niin, Social Welfare, Tribal Affairs, Women & Child Development minister Lalrinpuii leh secretary Lalzarmawii ten an hmanpui.

Minister Lalrinpuii chuan, zirna (education) chu 'all round development' ni mah se, by-heart chak chak dinchhuahna leh dinchanna, ngaihsannaah Mizoram zirna a kal mek nia a hriat thu sawiin, EMRS zirlaite chu an zirlaiah awmze nei leh hriatthiamna nen zir turin a chah.

Infiamna lama thei chungchangte tan hamṭhatna a tam thu leh infiammi zingah mi hlawhtling tak tak, sum leh pai pawh hlawh chhuak tam tak tak an tam tawh thu sawiin Lalrinpuii chuan, "Infiamna hi eizawnna tlak tak a ni tawh. Ruih theih thil laka kan fihlim zel theih nan infiamna hi a pawimawh a, Mizoramah HIV a darh chak a, HIV venna atan pawh sport hi a ṭangkai hle a ni," a ti.

Mizoramah EMRS 11 awmin, pawl 6 aṭanga pawl 12 thleng zir theihna vek a ni a; Academic session kal lai 2024-25 ah zirlai 1,902 an awm. Lunglei, Serchhip, Ngopa, Lawngtlai, Chawngte leh Tuipanga EMRS-te chu CBSE-ah dah a ni tawh a, Tlangnuam, Zawlnuam, Tlungvel, Niawhtlang leh Bilkhawthlir EMRS-te pawh CBSE-ah dah tum mek a ni.