VC-te'n court-ah sorkar an khing dawn: LAD Minister-in VC inkhawmpui a hmanpui
All Mizoram Village Council Association (AMVCA) chuan nimin khan Dawrpui Multipurpose Hall-ah inkhawmpui an hmang a, LAD minister C Lalsawivunga'n a hmanpui. AMVCA hian VC term pawh tâwi a nih avangin Gauhati High Court, Aizawl Bench-ah Mizoram sorkar khin an rêl.
AMVCA General Conference hi Aizawl City Local Council Association leh Lunglei Local Council Association aiawhte pawhin an hmanpui a; chawhnu lamah AMVCA president K Lalngaizuala kaihhruaiin ro an rel.
Rorelah hian AMVCA chuan, Mizoram sorkarin VC term a titâwi chu ṭha an ti lo a, VC term tihtawina thupek chu high court-a khin an rel a ni. Court-a kalna atan hian VC tinin Rs 500 ṭheuh thawh phawt a, a daih loh chuan khawn leh an rêl bawk. VC eng emaw zat chuan nimin khan pawisa an thawh nghal a ni.
AMVCA hian resolution an siam a, "Kan ram, kan hnam leh kan khawtlang hmasawnna turin theihtawp chhuah chhunzawm zel turin kan inpeih reng. Tualchhung rorelna ṭha leh ngelnghet a awm theih nan kan bei zel ang. VC zahawmna leh ropuina palzût hi engtikah mah rem kan ti ngai dawn lo a, kan hnunga VC lo la ni leh zel turte tan pawha VC ngelnghet leh rintlak siam turin theihtawp kan chhuah zel dawn," an ti.
VC inkhawmpuia khuallian LAD Minister chuan, VC member-te chu mipui rawngbawltu an nih angin taima leh rinawm taka chak taka hna thawk turin a chah a, "Finance Commission grant aṭanga sum hmuh, hun rei tak unitilisation certificate thehluh loh leh thil fel lo dang awmte chu chinfel a ni a, kum 2022-23 second instalment pawh release nghal a ni," a ti a; VC-te chu hna an thawh danah leh sum an hman danah muang thei an nih loh thu a sawi.
LAD minister C Lalsawivunga chuan, Finance Commission grant chu portal-ah dah (upload) vek a nih thu sawiin "Geotagging hmangin a hnathawh chin vil reng a ni a, pawisa hman dan a langtlang vek. Pawisa hi account-a a lo luh aṭangin muangchang loa thawh vat vat tur a ni," a ti. Sum an hman chak loh êm avang te, hna an thawh chak loh avangtein sum rawn kal leh tur an hmuh tlai phah ṭhin thu a sawi bawk.
LAD MINISTER SAWI DANGTE
* Rashtriya Gram Swaraj Abhiyan hnuaia panchayat bhavan sak hna VC ṭhenkhat thawh mekte hmanhmawh ang che u.
* Second instalment thun turin office lam an inpeih thlap tawh.
* Tuna hna kal mek bak hi panchayat bhavan tam zawk sak belhna tur sorkar laipui chuan a ruahman.
* Bank-a zero balance account hawng tura tih, la hawng lo VC-te'n hawng thuai ang che u.
* VC innghahna Lushai Hills District (Village Councils) Act, 1953 chu a hun lai chuan dan ṭha tak ni mah se, hun kal zelah ram leh khawtlang danglam zel leh hnathawh dan mil tur inkaihhruaina thar siam a hun tawh.
* Lushai Hills District (Village Councils) Act, 1953 thlakna tur Drafting Committee-te'n uluk taka buatsaihin, mithiamte nen inràwnkhawmna vawi tam tak an nei tawh a, tunah Law & Judicial department endik turin a kal mek.