Durtlang Leitan leh Sihphir inkar kawng 33% siam zawh a ni tawh

Mizoram State Project Monitoring Committee (MSPMC) chuan tun hnai khan Durtlang Leitan leh Sihphir inkar kawng siam mek an endik. Kawng hi January 2025-ah thawh zawh tura ruahman ni mah se, 33% vel chiah zawh a la ni.

Sorkar thuchhuah tarlan danin, Durtlang Leitan - Sihphir kawng hi km. 10.250-a thui tur a ni a, kawng siam nan Ministry of Road Transport & Highway (MoRTH) hnuaia Central Road & Infrastructure Fund (CRIF) aṭangin cheng vbc 46.57 hmuh a ni. EPC mode-a thawh a ni a, kawng siamtu chu SLT Infracon Pvt. Ltd., Hailakandi, Assam niin, sum ruahman chu vbc 35.53 a ni.

Kawng siamah hian a ṭul dan leh remchanna laia kawng laih zauh te, kawng chhuat tihmuk ṭhat te, alkatra luan hlui hai khawh te, kawngpui phah nghahchhan atan dry lean concrete mm. 150 (inch 6) leh metre 6-a zau phah thar te, kawngpui phah thar/concrete pavement, concrete M40 grade mm 250 (inch 10)-a chhah siam te, culvert awmsa zawm sei te, hume pipe culvert leh retaining wall siamte a tel.

November 2024 thlenga hna thawh tawh chin chu 33% vel a ni a; January 2025-ah zawh tura tih ni mah se, hna a khaihlak ṭhin avangin zawh hun tura ruahmanah an zo hman dawn lo niin a lang.

Leitan-Sihphir kawng siamna atan hian concrete grade sang tak hman a ni a, a siamna hmanrua pawh a ṭha thawkhatah MSPMC member-te chuan an ngai.

Kawng endiknaah hian MSPMC hi vice chairman an vice chairman R Lalrinawma hoin an kal a; PWD Aizawl Road North Division-a officer te, Durtlang Local Council leh Sihphir Village Council aiawhte an tel bawk.