Champhai Jail sak ṭhat a ni dawn - Home Minister

Home minister K Sapdanga chuan November 23, Inrinni khan Champhai District Jail a tlawh a, District Jail chu sak ṭhat a nih dawn thu a sawi a, ram tan ṭan la thar turin police-te a chah.

Minister K Sapdanga'n Champhai District Jail a tlawhnaah hian thawktute'n an mamawhte an lo thlen a; District Jail chu SASCI ( Special Assistance to States for Capital Investment) Part IV aṭangin sak ṭhat a nih tur thu a sawi a ni.

Mizorama jail hrang hrangah awm tur zat bithliah aia tam an awm deuh vek thu sawiin Sapdanga chuan, "Mihring kan pung zel a, sualnate pawh a pung ve zel bawk. Jail-a lut kan tam telh telh a, kan rama mihring cheng zat nena khaikhin chuan jail táng kan ṭhahnem hle a, hei hi thil pawi tak a ni," a ti.

Home Minister chuan, "Kan police-te leh tlawmngai pawlte'n theihtawp an chhuah zel ang a, hmasawnna hmuh zel kan inbeisei. Ruihhlo laka fihlim lo police awmte hian nghawng a neih thuizia kan hriat a ṭul," a ti a, ram tan ṭan la thar ṭheuh turin police-te a chah.

K Sapdanga chuan, mi ṭhenkhatin jail aṭangin thil ṭha zir chhuah an neih laiin, ṭhenkhat erawh chuan thil ṭha lo thiam belhte an nei ṭhin tih a sawi a, "Jail-a thawktute pawhin ṭan kan lak thar a ṭul a, mihring nun siamṭhatna hmun tak taka chhuah turin taima takin kan enkawlte i vil ang u," a ti a; mi ṭhahnemngaite'n Pathian thu leh nunkawng dik an hrilhte leh thiamthil zirna buatsaihte chu jail-a tángte'n chhawr ṭangkai zel se a duh thu a sawi.

Champhai District Jail hi mi 105 awm theihna tura buatsaih a nih laiin, mi 165 an awm mek a, mipa 150 leh hmeichhia 15 an ni. Thawktu 20 an awm mek bawk.

Home Minister hian Zokhawthar Police Station leh Land & Custom Station building sak tharte a tlawh bawk a, thawktute nen an inkâwm. Hringlang Tlang Society sawmna angin Hringlang Tlangah hun a hmang bawk a ni.