Kawlphetha man pek lâwk a ngai dawn; Smart meter vuah tur nen inremna ziah a ni

Power & Electricity department chuan kawlphetha hman man pek lâwk (pre paid) tawh turin an buaipui mek a, chumi atana pawimawh smart meter vuahtu turte nimin khan inremna thuthlung an ziahpui.

Mizorama Smart Metering Project thawktu atan hian e-tender hmangin Advance Metering Infrastructure Service Provider (AMISP) thlan an ni a; PE minister F Rodingliana pisaah nimin khan PE department leh AMISP chuan MoU an ziak a ni.

PE department tarlan danin, Ministry of Power hmalaknain India ram pumah electric power distribution tihchangtlunna tur Revamped Distribution Sector Scheme (RDSS) hnuaiah Smart Metering Project kalpui a ni a, state tam zawkah kalpui ṭan tawh niin, Mizoramah pawh bul ṭan a ni dawn ta a ni.

Smart metering hi pre-paid tur a ni a, meter vuah chu TOTEX mode a thawh tur a ni. AMISP-in an sum sengin an thawk phawt dawn a, meter a ṭha ngei (go-live) tih a chian aṭanga thla khatna aṭangin consumer-te smart meter service charge chu department-ah thla 93 chhung bill an thehlut ang. Meter man (benchmark price) aṭanga 22.5% chu sorkar laipuiin a tum dawn.

Smart meter vuah hna thawktu tur thlang tur hian e-tender chhuah a ni a, open competitive bidding hmanga thlan a ni. AMISP hi October 14, 2024 khan letter of award pek a ni a, nimin khan inremna ziahpui an ni. Letter of award pek aṭanga thla 27 chhunga zawh tur a ni a, an zawh aṭanga thla 93 chhung an enkawl zui ang.

MoU hian Mizorama consumer 2,89,383-te pre-paid smart meter vuahsak vek bakah, distribution transformer (DT) 2,300-a smart meter vuah leh 11kV feeder 398 atana smart meter vuahte a huam a ni.

PE department chuan Smart Metering Project chu a lian tham a, thil thar a nih bawk avangin a thawktu tur pawh duh ang ang hmuh theih a nih loh thu an tarlang a, "Ram hmasawnna tur hna pawimawh tak thawktute hi a ṭul hun apianga lo ṭanpui a, chak zawka hna thawh a nih theih nan lo thawhpui ṭheuh turin Mizoram mipui kan ngen a ni," an ti.

SMART METER ṬHATNA

◆ Mipuiin kawlphetha chhit man an pek lâwk tawh dawn avangin collection efficiency 100% a ni thei tawh ang. Bill bá a awm tawh dawn loh avangin thla tina bill dawn a pung thei dawn.

◆ Bill siam sual, bill sem tlai leh reading lak mumal loh a awm tawh lo ang.

◆ Online-a bill pek tur a nih dawn avangin duh hun hunah consumer-te'n an pe thei tawh dawn a, thla tawpa a hlawma bill pek ngai tawh loin, mipuiin thla khatah an mamawh ang tâwk zelin duh zat zat thla khat chhungin an pe (top-up) thei ang. An duh zawk chuan thla hnih, thla thum atan pawh an pe lawk thei dawn.