KHAWTHLIR

Doctorate hlan

World Culture & Environment Protection Commission chuan Mizoram Pollution Control Board member secretary C Lalduhawma hnenah November 18, 2024 khan honorary doctorate degree an hlan. Degree an hlan chhan hi - leilung leh a chhunga awmte leh boruak thianghlim neihna tura a thawh ṭhat vang a ni.

Remsiami chhuang

ZPM Ṭhalai chuan thuchhuah siamin, hockey player Lalremsiami Hmar-in India ram tan vawi 150 a khel tling tawh leh goal 40 a khung tling tawh chu an lawmpui a, an chhuan thu an tarlang. India, Japan, Malaysia, China, Thailand leh South Korea telna Women's Asian Champions Trophy 2024 final-ah November 20, 2024-a China nen an inkhelh turah leh a kal zelna turah duhsak an hlan bawk.

Meth & heroin man

Assam Rifles chuan nimin khan Zokhawtharah methamphetamine kg, 28.520 leh heroin (no. 4) gram 52 an man. Heroin kengtu Myanmar lam mi pahnih - Zamluni (35), Teddim leh Bawihnunthang (32) s/o Pakdai, Thatyarkhung te an man tel a; meth kengtu/neitute erawh Myanmar lamah an tlanchhiat hman avangin man an ni lo.

Mi bo zawng mek

Lalbiakzova (40), Keiṭum chu November 16, 2024 aṭangin a chin hriat a nih loh avangin khawtlangin an zawng mek. Thu dawn danin, Lalbiakzova hi a bo hnuah khawtlangin an zawng a, Keiṭum bakah, Serchhip, Bungtlang leh Khawlailung mite'n an zawnpui bawk. Ni li chhung zawn a ni tawh a, a bo ṭanna nia hriat thlâm aṭanga hla vak loah a slipper hmuh a ni a, km. 1 vela hlaah a kawr hmuh a ni bawk.

Raltlan tan buhfai

Lunglei bawrhsap R Lalṭhazuala chuan nimin khan DC pisa tual aṭangin Lungleia Ramthar Veng, Farm Veng leh Serkawna raltlan awm mekte hnena sem tur buhfai a vailiam. Buhfai sem tur hi Lunglei district tan quintal 129.6 dawn a ni a, pakhat tan kg. 20 zela sem tur niin, a tahtawla sem chhunzawm tur a ni. Hriat theih chinah Lunglei district-ah raltlan mi 1,829 an awm mek.