Hunpui atan police-in ṭan an la thar; Hâlpuah vaiin Aizawla dawr an dap ṭhin

Kumina Krismas leh kum thar hunpui lo thleng tur mipuiin rálmuang tak leh hlim taka an hman theih nan Mizoram Police-in ṭan an la thar mek. Police-te hian zan lamah Aizawl khawpuiah night patrolling ngawrh zawka an kalpui tawh bakah, sorkar khap hâlpuah leh a kaihhnawih thilte zuar an awm leh awm loh endikin dawr hrang hrang an dap tawh.

Mizoram Police tarlan danin, Aizawl District Executive Force hnuaia police station hrang hranga mite chuan tunlai hian halpuah, hâlmawi leh a kaihhnawih thil, sorkarin a khapte zuar an awm leh awm loh an endik ṭhin a; sorkar khapna thupek a hlawhtlin ngei theih nan sorkar hmalakna thláwp turin mipui an ngen a ni.

Aizawl khawpui chhunga police station hrang hranga police-te chuan November 18, Thawhṭanni leh nimin khan Aizawla dawr hrang hrang an endik a; halpuah, halmawi leh sorkar khap thil dangte man an nei lo.

Hâlpuah leh hâlmawite chu online hmanga chah theih a nih avangin police-te chuan courier service hrang hrangte'n bungrua an dah khawmnate an endik bawk.

Vanglaini zawhna chhangin Aizawl SP Rex Zarzoliana Vanchhawng chuan, police-te chu pawikhawihna chi hrang hrang veng turin zan lamah hmun hrang hrangah an kal kual ṭhin tih a sawi a, "Hunpui a hnaih chhoh zel avangin tun hnaiah ngawrh lehzualin kan duty ṭhin," a ti.

Mizoram Police chuan, ngawrh lehzuala police night patrolling an tih chuan rûkrûk, insuam, khawlai zu rûi bengchheng, kut inthlak leh sualna hrang hrangte a véng hle niin a tarlang bawk.