KHAWTHLIR
May 26-ah Larsap lalut dawn
Mizoram Governor thar tur Lt.Gen. Nirbhay Sharma chu May 26, 2015 tlaiah lak luh tum a ni.
Thisen pe
St. Paul's Higher Secondary School-a Class XII Section-B te chuan, nimin khan Aizawl Civil Hospital-ah thisen unit 10 an pe a, a petute hmeichhia paruk leh mipa pali an ni.
Thiin chhar
Nimin tlai dar 4:15 khan Laldikzuala (48) s/o Thanhawli (L), Serchhip Bilzel Veng chu a in luahah thia hmuh a ni. Thu dawn danin, Laldikzuala hi amah chauha khawsa a ni a, an ṭhenawm nuin nilenga a hmuh loh avangin a in luahah a va en a, thiin a hmu ta a ni.
Book Fair
Rashtriya Madhyamik Shiksha Abhiyaan (RMSA), Kolasib district chuan nimin khan zirlaite tan Synod Bookroom building-ah Book Fair an buatsaih a, Kolasib DC Jitender Yadav-a'n a hawng. Book Fair hi Kolasib-a sikul 26-a zirlai ṭhahnem takin an tlawh.
Animal camp
Nimin khan Chhingchhip community hall-ah bialtu MLA Lalrinawma hmalaknain AH&Vety department-in Awareness Campaign - cum - Animal Health Camp an buatsaih a; ran vulhtute'n bawng, vawk, ui leh árte an entir a, ran damdawi leh ran enkawl dan zirtirna bu a thlawnin sem a ni.
Assistant engineer
MPSC chuan nimin khan Disaster Management & Rehabilitation department-a contract-a thawk tur assistant engineer (Civil) lakna result a tichhuak a, PC Zohmingsanga s/o Lalpuiliana, New Chalrang a tling.
MJA Library pe
PC Lallianthanga chuan a lehkhabu siam pathum - 'Chhiatrupna laka invên dan', 'Chess kaihhruaina' leh, 'Yoga and Me' tihte chu MJA Public Library-a dah atan a pe a; a chungah MJA chuan lawmthu a sawi.
MST bus titawp
Kumin June thla tir aṭangin Aizawl leh Khawlian inkara MST bus service chu fûr ruahtui tlâk tam hun chhung tihtawp lailawk a ni dawn.
Anti-Terrorism Day
Nimin, May 21 khan Anti-Terrorism Day a ni a, Mizoram police-te chuan hmun hrang hrangah an hmang. Anti-Terrorism Day hi Police Headquarters-ah chuan DGP Dharmendra Kumar kaihhruaina hnuaiah hman a ni a; Mizoram district tinah SP hoa an hman bakah, unit leh battalion tinte'n an SP leh commandant-te hoin an hmang bawk a ni.