MNYF-in Mizoram sorkar an dem

Mizo National Youth Front chuan, tun hnaia Manipur-a Zo hnahthlak mi 11 thihna chungchangah Mizoram sorkar a ngawi tlat nia sawiin, an dem thu an tarlang.

MNYF chuan, Manipur-a Zo hnahthlak mi 11 thah an nih mai bakah, an ruangte Silchar Medical College-a endiknaah pawh harsatna an la tawk zui zel tih an tarlang a, "Heti taka rapthlak thihna leh diriamna kan unaute'n an tawrh laia Mizoram sorkar a ngawi tlat hi demawm kan ti. Chief Minister tan hian BJP sorkar dem zawnga ṭawng chhuah a rem lo a nih pawh Home Minister tal hi ṭawng chhuak ve rawh se," an ti.

MNF ṭhalaite chuan, "Home Minister hian MLA election dawn khan Manipur-a kan hnampuite'n harsatna an tawh chuan a hmunah an kal chilh tur thu a puang a, thla 10 chuang an sorkar chhungin eng mah an ti leh si lo hi a demawm tak zet a ni," an ti a; MNF ṭhalaite chuan Manipur leh hmun danga an hnampui harsatna tâwkte ṭanpui turin ṭan an lak zel dawn thu an tarlang.