Chaltlanga Tourist Lodge 5-star hotel-ah siam tuma hmalak a ni

Tourism minister Lalrinpuii chuan, Chaltlanga Tourist Lodge chu five star hotel-ah siam a nih theih nan mimal hnenah hlan tum a nih thu leh, hmalak mek a nih thu a sawi.

Lalrinpuii hian nimina Aizawl Press Club-a press conference a neiah Mizorama five star hotel awm miah lo chu a vei thu sawiin, ram pum leh ram dang huap ṭhutkhawm lian tham thlen a theih loh ṭhin thu a sawi a, "Hotel chain lian tak takte'n Mizorama 5-star hotel din an duhna (offer)-te pawh kan hmu a, chuvangin, Chaltlang Tourist Lodge hi 5-star hotel a nih theih nan outsource mai turin hma kan la a, tih tur ang angte kan tifel nual tawh. Kan sorkar chhung ngeiin 5-star hotel kan neih theih ka beisei," a ti.

Tourism Minister sawi danin, Chaltlang Tourist Lodge chu a hlutna hriat chian hmasak a ngaih avangin assets valuation ti turin PWD ngen an ni a, PWD-in a hlutna an chhût chhuah hnuah expression of interest chhuah theih beisei a ni.

Project hrang hrang - pilgrimage leh heritage tourism tihchangtlunna tur te, meeting leh conference lian thlen theihna tur project te, eco-tourism site-a khualzinte mamawh siamna tur te, Berawtlang chei ṭhatna tur te, state chhung thil siamte zawrh chhuahna tur Aizawl Haat siam te, PM Ekta Mall leh thil dangte buaipui mek a ni bawk.

(Phek 2-ah zawm a ni)