MNF leh HPC(R)-in Aizawl DEO-ah Sorkar an siam theih thu an thlen

Sinlung Hills Council (SHC) inthlanpui neih zawh taka MNF leh HPC(R) aṭanga thlan tlinte chuan nimin khan Aizawl district election officer (DEO) Lalhriatpuia, bawrhsap hnenah sorkarna an siam theih thu an thlen.

SHC inthlan neih zawh takah khan MNF leh HPC(R) hian bial 12 awm zinga bial psarih an la a, sorkarna siam tura seat lak ngai zat an la tling chiah a ni. MNF-in bial panga an la a, an thawhpui HPC(R)-in bial pahnih an la thung.

SHC sorkar siam tur hian Aizawl DEO-in SHC Secretariat-ah a thlen ang a, anni'n District Council & Minority Affairs department leh State Election Commission-ah an thlen leh ang. November 21, 2024 hmain sorkar thar lak luh tur a ni.

MNF leh HPC(R)-te hian legislature party an din a; member-te chu - Vanbawng biala thlan tlin Ricky Lalremsanga, Ratu biala thlan tlin Lalhmingthanga, Sakawrdai biala thlan tlin Lalhriatchhunga Hmar, Sakawrdai biala thlan tlin Melody Lalchhuangzeli, Zohmun biala thlan tlin Benjamin Lalrawnliana, Ṭinghmun biala thlan tlin R Lalfakzuala leh Saiphai biala thlan tlin Zokhumthanga te an ni.

SHC inthlanpuiah hian ZPM leh HPC ṭang dunin bial pali leh Congress party-in bial pakhat an la ve bawk.