SHC-ah MNF leh HPC(R)-in seat 7 an la; New Vervek bialah ZPM candidate a tling

Sinlung Hills Council (SHC) inthlan neih zawh tâkah MNF leh an thawhpui HPC(R)-te ṭang dun chuan seat pasarih lain sorkarna an siam thei dawn. New Vervek biala vote tlate chu ṭum li chhiar ṭhat a ni a, a ṭum lina chu rin tlang niin, ZPM candidate Lalhlunchhunga a tling.

New Vervek bial vote tlate hi New Vervekah ṭum thum chhiar a ni a, a ṭum khatnaah MNF candidate chu vote khatin a chak a, a ṭum hnihnaah ZPM candidate vote sarihin a chak a, a ṭum thumnaah pawh ZPM candidate vote 15-a chaka puan leh a ni.

New Vervek bial returning officer (RO) thil tih danah lungawi lo an awm avangin vote chhiarna pawnah mi eng emaw zat tlaivarin an pungkhawm a, a tûka RO-in Aizawl a pan tur dan tumin an pungkhawm leh bawk. Hei vang hian police lam pawh Aizawl SP hoin an thawk chhuak a, hun eng emaw chen an indang buai a, buaina lian tham thleng loin RO chu hruai chhuah a ni.

Thuneitute chuan New Vervek biala vote tlate chu chhiar ṭhat turin thutlukna an siam a, Nilaini tlai dar 4 aṭangin Aizawl District Election Office (Aizawl DC) uapna hnuaiah DC complex-ah chhiar ṭhat leh a ni a, ZPM candidate Lalhlunchhunga chu vote 12-a chakah puan a ni ta a ni.

New Vervek bialah hian ZPM candi­date Lalhlunchhunga'n vote 396, MNF candidate C Lalnuntluanga'n vote 384, Congress candidate PC Vanlalthlana'n vote 80 leh independent candidate C Vanlalhruaia'n vote 93 an hmu.

SHC-ah hian bial 12 a awm a; MNF-in seat 5 lain, an thawhpui HPC(R) candidate (independent)-in seat hnih an la a, an pahnihin seat 7 lain, sorkarna an siam thei dawn a ni.

ZPM leh HPC ṭang dun chuan bial 12 zinga pali an la a; ZPM-in bial pariat an chuh zinga pali an la a, HPC-in bial pali chuhin, an chak lo vek thung.

Bial zawng zawng chuhtu Congress party chu bial pakhatah an chak a; bial pakhat chuhtu BJP-in bial lak an nei lo.