MCAB-in Sekibuhchhuak scheme siam

Mizoram Cooperative Apex Bank (MCAB) Board of Directors chu nimin khan an Head Office-ah an ṭhukhawm a, special deposit scheme thar 'Sekibuhchhuak' an pawm.

Ṭhutkhawm hi MCAB chairman Lalnunsanga'n a kaihruai a, bank hma­lakna hrang hrang an thlirho.

'Sekibuhchhuak' scheme an pawm a; he scheme hi deposit (pawisa dah luh) kum khata pung 7.5% bakah, kum upa (senior citizen)-te tana interest 8% siamsakna a ni.

MCAB hotute chuan November 2024 tawpah Siaha New Colony Branch hawn an rel a, branch 30-na a ni ang. Thawktu - assistant grade (clerk) 18 lak tura an lo tih tawh chu tipungin, 27 lak turin an rel a; JMG (officer) pahnih lak tura an tih tawh chu pathumah an tisang bawk.

MCAB hotute tarlan danin, Apex Bank hian sum kum kal mekah deposit cheng vaibelchhia 1,539.2 an hmu tawh a, loan cheng vbc. 1,206.1 an pe chhuak tawh a; deposit aṭanga loan pek chhuah zat, credit deposit ratio chu 78.8% a ni.