Kum upate Mizoram innghahna an ni - Minister Vanlalhlana

Mizoram Upa Pawl (MUP), Chaltlang Branch chuan an din champha vawi 50-na, golden jubilee chu nimin khan Tourist Lodge, Chaltlangah an lawm a, bialtu MLA Vanlalhlana, minister-in hmanpuiin, kum upate chu Mizoram innghahna an nih thu a sawi.

Vanlalhlana chuan, MUP, Chaltlang Unit-in golden jubilee hmel an hmu thei chu a lawmpui thu a sawi a, "MUP member-te hi Mizoram innghahna pawimawh tak in ni a, in tawnhriatte hi khawtlang tana ro hlu a ni. Kan ṭobul min hriattirtu leh history a taka kan hmuh theihte in ni," a ti.

Chhuan lo awm zel turte hnenah an thiamna leh finnate hlan chhâwng zel thei tura MUP member-te chahin Vanlalhlana chuan, "Mihring kumbi chhiarah upat hi natna ni loin hnehna a nih zawk," a ti a; khawvel inher danglam zelah upate chu ṭhalaite finchhuah tura thawhpuiah a sáwm.

MUP, Chaltlang Unit-in golden jubilee an lawmna hunah hian darkhuang vawi 50 vuaa bul ṭan a ni a, jubilee pualin hun hman zui a ni. Chaltlang MUP hi November 3, 1974 khan din a ni a, kumin hian an din ṭan ní tak Pathianni a nih avangin nimin khan an lawm a ni.