KHAWTHLIR

Thisen pe

Champhai District Two Wheeler Taxi Association chuan nimin khan an din champha pualin Champhai District Hospital tan thisen unit 40 an pe.

Lehkhabu tlangzarh

Lalfak Zuala, IAS (Retd.)-in ama chanchin a ziahna lehkhabu (autobiography), 'Ka Hringnun Lehkhaphek' tih chu nimin khan Mizoram chief Ssecretary hlui Lalkhama, IAS (Retd.)-in Aijal Club-ah a tlangzarh. Lalfak Zuala hi Mizoram chief secretary hlui a ni a; a lehkhabu hi phek 448-a chhah, Rs 450 man a ni.

OSD to CM tel

India Taiwan Working Level Meeting on Labour Cooperation chu nimin khan Taiwan-ah ṭan a ni a, India sorkar aiawha kal mi pali zingah OSD (on special duty) to chief minister Jonathan Lalremruata a tel. Meeting hi November 7, 2024 thleng neih a ni dawn a, India ram aṭanga ṭhalai 1,00,000 vel hna thawk tura Taiwan-a thawn dan tur rêl a ni dawn a; hna thawka thawn tur zingah Mizo eng emaw zat an tel ve theih beisei a ni.

CMRF aṭangin pe

Chief minister Lalduhoma chuan nimin khan Chief Ministers Relief Fund aṭangin ṭanpuina diltu Roslyn Kimbuang hnenah Rs 1,00,000 a hlan. Roslyn Kimbuang hian Manipur-a hnuchham naupang 24 a enkawlte chu Manipur buaina avangin Mizoramah a rawn raltlanpui a, Mizoram sorkarin Berawtlanga Tourism Convention Centre-ah a awmtir a; naupangte hian an awmna hnaivai sikulah zirna an chhunzawm mek a ni.

Vuah turin hriattir

Siaha DTO Dr Manesia Khaimeichho chuan, January 1, 2019 hma lama siam mihring phur sumdawnna lirthei (two wheeler leh autorickshaw huam loin) Siaha district-a register-te chu Transport department thupek angin, September 6, 2024 aṭanga chhiara thla ruk chhungin an lirtheiah vehicle location tracking device leh emergency button vuah vek turin a hriattir.