MLA-in MUP golden jubilee a hmanpui

Mizoram Upa Pawl (MUP), Mission Veng Unit chuan nimin khan Synod Conference Centre-ah an din champha vawi 50-na, golden jubilee an lawm a; Aizawl South II bialtu MLA Lalchhuanthanga'n a hmanpui.

MUP, Mission Veng Branch hi November 4, 1974-ah din a ni a; jubilee lawmna hi an president Lalthangliana Varte-in a kaihruai. Hruaitu hlui la damte hnenah chawimawina an hlan a, kum 90 tling tawh mi 13 hnenah lawmpuina thilpek an hlan bawk.

Bialtu MLA Lalchhuanthanga chuan, upate chu sorkar laipui leh UNO thleng pawha ngaih pawimawh an nih thu sawiin, "Hmânlai finna tunlai thlenga min rochuntute in ni a, tawnhriat ṭha tak takte paw chhuaktu in ni. Bial chhunga hmasawnnna chi hrang hrangah upate thuràwn lak fo a pawimawh a, in tu leh fate hmasawnnna turah ngaihtuahna min sènpui ṭhin ang che u," a ti. MLA hian a bial chhung hmasawnna atan thawhhopuiah a sawm a, jubilee lawmpuina pawisa a hlan nghal.

Bialtu corporator (Ward-XVIII) Malsawmzuala Ralte pawhin thu sawiin, upate thuràwn lâk nachâng hriat chu pawl kal dikna tura thil pawimawh tak a nih thu a sawi.