Sum hmuh nan chauha din nia ngaih theih society a tam niin a lang - HPC Vice Chairman

Lunglei District High Powered Committee (HPC) vice chairman V Malsawmtluanga, MLA chuan nimin khan Lunglei District Cooperative Union Limited (LDCU) pisa a tlawh a; Mizoramah sum hmuh nan chauha din nia ngaih theih society a tam nia a lan thu a sawi.

V Malsawmtluanga chuan, Mizoramah kohhran leh tlawmngai pawlah thawhhona ṭha a awm thu a sawi a, "Hetih lai hian, sumdawnna leh eizawnna atana thawhho dan kan thiam tâwk lo ṭhin. Mizoramah a din chhan anga kal lo leh sorkar ruahmanna kaltlanga sum hmuh nan chauha din nia ngaih theih society a tam niin a lang," a ti.

Hnathawktu intel khawma hmalakna (cooperative society) chu ram chhung ei leh bar hmasawnna atan leh mipuite din chhuahna atana pawimawh a nih thu sawiin Malsawmtluanga chuan, "Ram changkang apiangah cooperative society kaltlanga hmalakna a lian a, sum leh pai thawh chhuahna kawngah leh sorkar thâ tihchakna kawngah pawh an thawh hlawk," a ti a; cooperative society kal dan tur dik taka kalpui chu ram leh hnam hmasawnna atan a pawimawh thu a sawi.

Lunglei District Cooperative Union hi Mizoram sorkar hnuaia grant-in-aid centre for cooperative education a ni a, Mizoram Cooperative Societies Act hnuaiah May 31, 1993 khan din niin, Mizoram sorkarin thawktute hlawh, in luah man leh thil dang ṭhenkhat a tumsak a ni.