Vawiinah SHC inthlang dawn

Sinlung Hills Council (SHC) inthlanpui vawi hnihna chu vawiin hian neih a ni dawn a, zing dar 7 aṭanga tlai dar 4 thleng vote thlak hun hawn a ni ang.

SHC inthlanah hian vote thlak zawh veleh ballot box zawng zawng constituency headquarters panpui nghal tur a ni a, constituency headquarters-ah ballot box a thlen kim hnuah vote chhiar nghal a ni ang. SHC-ah hian voter 23,794 an awm a, mipa 11,875 leh hmeichhia 11,914 an ni.

SHC-ah hian bial 12 a awm a, chungte chu Aizawl district chhungah bial paruk, Kolasib district-ah bial pahnih leh Saitual district-ah bial pali a ni. MLA bialah chuan Tuivawl constituency-ah bial paruk, Chalfilh constituency-ah bial pali leh Serlui constituency-ah bial pahnih a awm.

Thu dawn danin, SHC inthlanah hian Indian National Congress (INC), MNF leh HPC(R), ZPM leh HPC ṭang dunte'n bial tin an chuh dawn a, BJP-in bial pakhat an chuh dawn. Candidate dang 11 an awm dawn bawk a, candidate zawng zawng chu mi 49 an ni.

Hetih lai hian, State Election Commission-in candidate list a tarlanah chuan political party-in an candidate atana an tih ṭhenkhat chu independent candidate anga ziah luh a nia hriat a ni.

SHC inthlan chuh tura hming pek luhte chu October 11, 2024 khan endik a ni a, mi 50-in hming pe lutin, pawm vek a ni. October 14, Thawhṭanni tlai dar 3 thleng khan inhnuhdawhna hun hawn a ni a, BJP candidate pakhat a inhnuhdawh avangin candidate 49 an awm dawn ta a ni.

Khawlian, Ṭinghmun leh Saipum bialahte candidate paruk ṭheuh an awm a; Phuaibuang bialah candidate panga, Suangpuilawn, New Vervek leh Saiphai bialah candidate pali ṭheuh leh, Vanbawng, Ratu, Sakawrdai South, Sakawrdai North leh Zohmun bialahte candidate pathum ṭheuh an awm.